Тэргүүний мэндчилгээ

Монголын Хүүхдийн Анагаахын Академи (МХАА)–ийн гишүүд ба хүүхдийн эрүүл мэндийн төлөө бие-сэтгэл, оюунаа дайчлан ажиллаж байдаг олон зуун хүүхдийн эмч, сувилагч нар, эрүүл мэндийн ажилтнууд, МХАА–ийн үйл ажиллагааг дэмжин тусалж байдаг бүх хүмүүст “Хотол төгс” хэмээх төмөр хулгана жилийн мэндчилгээ дэвшүүлье.

АУ-ны доктор Д. Агиймаагийн санаачлага, идэвхтэй үйл ажиллагаагаар “Монголын хүүхдийн эмч нарын холбоо” нэртэй төрийн бус, ашгийн бус байгууллага 2014 онд байгуулагдан 2015 онд нэрээ “Монголын Хүүхдийн Анагаахын Академи” болгон өөрчилж гишүүд, дэмжигчдийнхээ дунд идэвхтэй үйл ажиллагаа явуулж ирсээр долоо дахь жилийн нүүр үзэж байна. Тус академи АШУҮИС–ийн АУС–ийн Хүүхдийн Анагаахын Тэнхимийг түшиглэн байгуулагдсан цагаасаа эхлэн ЭМЯ–ны хүүхдийн мэргэжлийн зөвлөл, “Хүүхэд судлаач” оюутны клубтэй нягт хамтран ажиллаж ирсэн бөгөөд МХАА–ийн гишүүд, хүүхдийн эмч нарынхаа эрх ашгийг хамгаалан тэд нарынхаа мэргэжлийн үйл ажиллагааг дэмжих, онолын мэдлэг, ур чадварыг дээшлүүлэхэд туслах, эмч судлаачдын бүтээл, судалгааны ажлыг хэвлүүлэхэд нь дэмжих, шилдэг эмч нарынхаа туршлагыг дэлгэрүүлэх, хүүхдийн эрүүл мэндийн албанд олон жил үр бүтээлтэй ажиллаж буй хүмүүстээ урам хайрлах, залуу эмч нарын мэргэжлээрээ өсөж хөгжихөд тусалж дэмжих зорилго бүхий олон талт үйл ажиллагаа явуулж ирснийг энэ вэбсайтаас мэдэх болно.

Бид 2014 оноос эхлэн тусгай болзлын дагуу оны шилдгийн шилдэг ба шилдэг эмч нарыг шалгаруулж мөнгөн шагнал, дурсгалын өргөмжлөлөөр шагнаж ирснээ дуулгахад таатай байна. Жишээлбэл 2014 онд шилдгийн шилдэг эмчээр шалгарсан Хэнтий аймгийн Бэрх сумын сум дундын эмнэлгийн хүүхдийн зөвлөх зэрэгтэй эмч Я. Дарьбазар 2018 онд МУ–ын “Хүний гавьяат” эмч цол хүртсэнд МХАА–ийн хамт олон бахархан баярлаж байна. Я. Дарьбазар маань “Булган сүүлтэй” байж дараа дараагийн шилдгийн шилдгүүд: Р. Батсолонго (2015, ЭХЭМҮТ), Ө. Туул (2016, БЗД), С. Жаргахсайхан (2017, Говь-Алтай), Д. Цэцэгээ (2018, Дархан-Уул), Ж. Сүрэнчимэг (2019, ЧД) нартаа удахгүй “Гавьяат” цол хүртэхийг ерөөе.

МХАА гишүүд дэмжигчидтэйгээ хамтран шинэ жилийн баяраа тэмдэглэн оны шилдгүүдээ шалгаруулдаг уламжлал тогтлоо. Сүүлийн 2 жилд хүүхдийн эмч нар дотроос тусгай болзлоор шалгаруулсан оны шилдэг залуу эмчээр  Л. Соёлоо (2018, ЧД), Л. Отгонжаргал (2019, Завхан) нар шалгарсанд баяр хүргэж энэ шагнал залуу эмч нарыг жил бүхэн хүлээж байгаа гэдгийг тэмдэглэе.

МХАА–ийн үйл ажиллагаанаас тэмдэглэх ёстой нэг чухал ажил бол 2018 оны 11-р сард Монгол улсын Ерөнхийлөгчийн ивээл дор хийсэн “Эрүүл хүүхэд–Эх орны ирээдүй” Хүүхдийн эмч нарын улсын зөвлөгөөнийг ЭХЭМҮТ–тэй хамтран зохион байгуулсан явдал юм. Энэ зөвлөгөөнөөр хүүхдийн эрүүл мэндийн тусламж үйлчилгээний өнөөгийн байдал, цаашид сайжруулах арга замын талаар төр засагтаа сонордуулсан нь чухал ач холбогдолтой.

МХАА гишүүд, дэмжигчдийнхээ дунд сэдэвчилсэн сургалт семинар явуулах, урлагийн наадам, спортын бага наадам зэрэг нийтийг хамарсан ажлууд амжилттай зохиож ирсэн нь гишүүд, дэмжигчдийнхээ идэвх санаачлагыг өрнүүлэх чухал ач холбогдолтой боллоо.

МХАА–ийн хэвлэл “Монголын Хүүхдийн Анагаах Ухаан” сэтгүүлд эмч нарын судалгааны илтгэл, өгүүллэг, мэргэжлийн зөвлөгөөнүүд хэвлэгдсээр байна. Бид цаашид МХАА холбоогоо улам бэхжүүлж гишүүдийн таашаалд нийцсэн үйл ажиллагаа явуулах болно. Хүүхдийн төлөө цохилох зүрхтэй хэн ч гэсэн манай академид гишүүнээр элсэхэд академийн үүд хаалга үргэлж нээлттэй байна.

МХАА–ийн үйл ажиллагааг байгуулагдсан цагаас нь эхлэн дэмжин тусалж байгаа хүүхдийн эмч Ц. Тунгалаг захиралтай "Ази Фарма" ХХК–ийн хамт олонд талархал илэрхийлэх ялдамд та нартаа эрүүл энх, ажлын өндөр амжилт, аз жаргалыг билэгдэн ерөөе!

Монголын Хүүхдийн Анагаахын Академийн ерөнхийлөгч, МУ-ын Ардын эмч, Хүний гавъяат эмч,

АУ-ны доктор, профессор Данзангийн Малчинхүү